Националниот портал за е-услуги е електронска платформа, достапна на https://uslugi.gov.mk, преку која можете да добиете информации за јавните услуги и да искористите некоја од достапните во овој момент е-услуги од надлежни органи. Порталот е воспоставен и управуван од Министерството за информатичко општество и администрација, согласно Законот за електронско управување и електронски услуги („Службен весник на Република Северна Македонија” бр.98/2019, 244/2019), каде што е дефинирана електронската размена на податоци и начинот на кои таа треба да се спроведува, давањето на е-услуги, работењето на посредниците и друго.
Националниот портал за е-услуги се состои од јавен дел и приватен дел.
Јавниот дел на порталот има содржини кои се наменети за граѓаните и за компаниите, како и за останатите организации. Во рамки на содржините објавени на Порталот, објавени се податоци кои се однесуваат на услуги на централно и на услуги на локално ниво. Објавените услуги се однесуваат на државјани на Република Северна Македонија и на странски државјани.
Јавниот дел е достапен за сите посетители, без потреба од каква било најава или идентификација. Во јавниот дел се објавени податоци за услугите кои ги даваат надлежните органи и другите субјекти – даватели на услуги. За секоја од услугите се достапни следните податоци: основни информации, надлежни органи, обрасци, поднесоци, услови, докази, рокови, информации за плаќање, законска регулатива и други.
Услугите можат да се пребаруваат и најдат по неколку критериуми:
- животен настан (пр. новороденче, вработување, започнување бизнис),
- категорија и поткатегорија (пр. лични документи и исправи/лични карти),
- азбучник (од А до Ш),
- надлежен орган (пр. Агенција за вработување на Република Северна Македонија)и
- со алатката за пребарување.
На јавниот дел се достапни и податоци за надлежните органи, вклучувајќи ја и нивната локација.
Приватниот дел е достапен само за регистрирани и идентификувани корисници. Регистрацијата и најавата на Порталот се одвива преку Систем за единствена најава (СЕН)- Што е Систем за единствена најава, што eID? Во моментот, преку СЕН можат да се регистрираат само физички лица. Детали за процесот на регистрација (Регистрација и најава на Порталот за е-услуги ) на СЕН можете да добиете тука.
Во овој момент, приватниот дел овозможува е-услуги за физички лица, државјани на Република Северна Македонија. Овој дел се користи за:
- поднесување на барање во електронска форма за добивање на одредена е-услуга;
- поднесување на докази, според пропишани критериуми;
- плаќање на надоместок и административна такса за е-услугата;
- следење на статусот на постапката согласно максималниот дозволениот степен на увид обезбеден од надлежниот орган;
- добивање на одговор на барањето и
- добивање на e-услугата.